Shërbime kontabiliteti në të gjithë Kosovën

Kontabilitet i rregullt, pa surpriza

Për çdo biznes në Kosovë — nga biznesi individual te SH.P.K.-ja me punëtorë — kontabiliteti i rregullt është themeli i qetësisë financiare. Fryti Audit merr përsipër tërë ciklin kontabël: nga regjistrimi i faturave deri te pasqyrat vjetore financiare, në përputhje me legjislacionin e Kosovës dhe standardet SNRF/IFRS.

«I rregullt» ka kuptim konkret: çdo faturë e regjistruar në periudhën së cilës i takon, banka e barazuar me librin, paga e llogaritur sipas shkallëve në fuqi dhe çdo deklaratë e dorëzuar para afatit. Kur këto rrjedhin pa ndërprerje, mbyllja e vitit bëhet rutinë dhe një kontroll i ATK-së kalon me dokumente në tavolinë, jo me shpjegime.

Punojmë me klientë në gjithë Kosovën — Pejë, Prishtinë, Prizren, Gjakovë, Ferizaj, Istog, Klinë e Deçan — kryesisht online, përmes një dosjeje të përbashkët. Takimin e mbajmë të paktën një herë në muaj, që numrat të mos mbeten thjesht raport i dërguar me email.

Çfarë përfshin shërbimi

• Regjistrimi i faturave të shitjes dhe të blerjes dhe mbajtja e librave kontabël
• Deklarimi i TVSH-së përmes sistemit EDI të ATK-së, deri më 20 të muajit
• Pagat, tatimi në pagë dhe kontributet pensionale, me deklarim deri më 15
• Ndalja në burim te qiraja dhe formulari WR, kur jeni qiramarrës biznes
• Këstet e tatimit në fitim dhe deklarata vjetore — PD ose CD, sipas formës juridike
• Pasqyrat financiare vjetore dhe barazimet me bankë, furnitorë e blerës
• Regjistrimi dhe amortizimi i pasurive fikse
• Raport mujor për menaxhmentin dhe komunikimi me ATK-në për çështjet rutinore

Çfarë merrni konkretisht çdo muaj

Regjistrimi i faturave

Çdo faturë hyrëse dhe dalëse regjistrohet me datë, palë, shumë, normë të TVSH-së dhe llogari përkatëse. Kontrollojmë nëse fatura e blerjes e jep të drejtën e zbritjes dhe nëse norma është ajo e duhura — 18% standarde ose 8% e reduktuar. Faturat pa element të detyrueshëm nuk kalojnë në libër pa u sqaruar me ju, sepse një faturë e pavlefshme sot bëhet zbritje e refuzuar në kontroll nesër.

Barazimi bankar

Pasqyra bankare krahasohet transaksion pas transaksioni me librin. Kështu dalin në sipërfaqe pagesat pa faturë, faturat e paguara dy herë, arkëtimet e paidentifikuara dhe komisionet e paregjistruara — para se të bëhen të përhershme në pasqyrat vjetore.

Pagat dhe listëpagesa

Llogaritet bruto, ndalet kontributi pensional 5% i punëmarrësit dhe shtohet 5% i punëdhënësit, kurse tatimi në pagë llogaritet mbi bazën që mbetet pas kontributit të punëmarrësit, sipas shkallëve mujore: 0% deri 250 €, 8% për 250–450 € dhe 10% mbi 450 €. Merrni listëpagesën e gatshme dhe shumat e sakta për transfer. Nga 1 korriku 2026 paga minimale është 500 € bruto; me 500 € bruto neto del 456,50 €. Paga duhet paguar përmes një institucioni financiar të licencuar, jo me para në dorë (neni 6 i Ligjit 08/L-257). Efektin e një page mund ta shihni vetë te kalkulatori i pagave.

Deklarimet: TVSH, WM dhe CM

Deklaratat dorëzohen përmes EDI-t brenda afateve: tatimi në pagë dhe kontributet me formularët WM e CM deri më 15, TVSH-ja deri më 20. Para çdo dorëzimi ju njoftojmë për shumën që duhet paguar, që pagesa të mos harrohet pasi deklarata të ketë shkuar.

Raporti mujor

Në fund të muajit merrni një pasqyrë të shkurtër: të hyrat, shpenzimet, rezultatin, gjendjen e llogarive të arkëtueshme e të pagueshme dhe detyrimet që vijnë. Ky raport është arsyeja pse kontabiliteti nuk duhet parë vetëm si detyrim ligjor, por si burim vendimesh.

Si rrjedh muaji, hap pas hapi

1. Ditët 1–5 — ju i sillni ose i ngarkoni dokumentet e muajit të kaluar; ne bëjmë kontrollin e plotësisë dhe kërkojmë çka mungon.
2. Ditët 5–10 — regjistrohen faturat, barazohet banka, mbyllen llogaritë e furnitorëve dhe të blerësve.
3. Deri më 15 — llogariten pagat, dorëzohen WM dhe CM dhe ndalja te qiraja me WR; merrni shumat për pagesë.
4. Deri më 20 — barazohen librat e TVSH-së dhe dorëzohet deklarata në EDI.
5. Fundi i muajit — mbyllet periudha, dërgohet raporti dhe mbajmë takimin e shkurtër.

Afatet tremujore e vjetore i mbajmë ne në kalendar dhe ju njoftojmë paraprakisht; të plotat i gjeni te kalendari i afateve tatimore.

Çfarë dokumentesh sillni dhe kur

Sa më herët të vijnë dokumentet, aq më shumë kohë mbetet për t'i sqaruar paqartësitë para afatit. Lista bazë: faturat e shitjes dhe të blerjes, pasqyrat bankare të të gjitha llogarive, dëftesat e arkës, kontratat e reja të punës dhe çdo ndryshim page, kontratat e qirasë, dokumentet doganore për importet dhe faturat e blerjes së pasurive fikse. Afati praktik është deri në ditën e pestë të muajit pasues. Lista e hollësishme, e ndarë sipas llojit, është te udhëzuesi dokumentet që i duhen kontabilistit.

Regjimi i thjeshtuar apo tatimi mbi të ardhurat reale

Kjo është zgjedhja që u kushton më shumë bizneseve të vogla kur merret gabim, sepse pragjet ngatërrohen me njëri-tjetrin. Janë tre pragje krejt të ndryshme dhe secili vjen nga një ligj tjetër.

Në regjimin e thjeshtuar tatimi llogaritet mbi qarkullimin bruto, pa u zbritur shpenzimet: 3% për tregti, transport dhe bujqësi dhe 9% për shërbime, zeje e profesione, me minimum 37,50 € për tremujor. Në baza reale ndryshon edhe norma sipas formës juridike: SH.P.K.-ja tatohet me 10% të fitimit të tatueshëm sipas ligjit për tatimin në të ardhurat e korporatave, ndërsa biznesi individual tatohet sipas ligjit për tatimin në të ardhurat personale, me shkallë progresive mbi fitimin e tatueshëm: 0% deri në 3.000 €, 8% për pjesën 3.000–5.400 € dhe 10% mbi 5.400 € në vit. Në të dyja rastet paguhen katër këste paradhënieje, më 15 prill, 15 korrik, 15 tetor dhe 15 janar.

Pragu i TVSH-së prej 30.000 € nuk ka lidhje me regjimin e tatimit në të ardhura: një biznes individual mund të jetë i detyruar të regjistrohet në TVSH dhe njëkohësisht të mbetet nën 50.000 € qarkullim. Te TVSH-ja ka edhe një kurth të njohur — detyrimi hyn në fuqi nga dita kur tejkalohet pragu, jo nga dita e kërkesës për regjistrim (neni 7.1 i Ligjit 05/L-037). Kush e vëren tejkalimin me vonesë, e gjen veten me faturat e ndërkohshme të lëshuara pa TVSH dhe me detyrimin që i mbetet atij — shihni udhëzuesin a duhet të regjistroheni në TVSH.

Kur ia vlen të kaloni vullnetarisht në baza reale

Regjimi i thjeshtuar është i lirë për t'u administruar, por tatohet qarkullimi, jo fitimi — prandaj ndëshkon çdo biznes me marzhë të ngushtë. Kalimi vullnetar ia vlen zakonisht kur shpenzimet e dokumentuara zënë pjesën më të madhe të të hyrave, si te tregtia me stoqe apo ndërtimtaria; kur investoni në pajisje që doni t'i njihni si amortizim; kur keni humbje për t'u bartur; ose kur banka a donatori kërkon pasqyra financiare të plota, të cilat regjimi i thjeshtuar nuk i prodhon. Anasjelltas, për shërbime pa shpenzime materiale, 9% mbi bruto shpesh del më e favorshme se 10% mbi fitim plus kostoja e librave të plotë. Këtë llogari e bëjmë me shifrat tuaja reale para se të vendosni.

Deklarata vjetore: PD apo CD

Forma juridike e përcakton formularin. Bizneset individuale e dorëzojnë deklaratën vjetore me formularin PD, kurse korporatat me formularin CD. Afati për të dyja është 31 marsi. Përgatitja nuk është thjesht mbledhje e dymbëdhjetë muajve: para saj bëhen barazimet finale, inventarizimi, amortizimi dhe rregullimi i shpenzimeve të panjohura — hapat e plotë janë te udhëzuesi për mbylljen e vitit financiar.

Kur librat vijnë të parregullt nga kontabilisti i mëparshëm

Një pjesë e mirë e klientëve nuk vijnë nga zeroja, por nga një marrëdhënie që ka përfunduar keq — me deklarata të padorëzuara, me llogari që nuk barazohen ose pa asnjë dosje të dorëzuar. Fillojmë me një inventar të gjendjes: cilat periudha janë deklaruar, çfarë figuron në llogarinë tuaj tatimore në ATK, sa është dallimi mes librit dhe bankës dhe cilat dokumente mungojnë. Pastaj rikonstruktojmë periudhat e mangëta dhe përgatitim korrigjimet.

Këtu vlen të dihet diçka që shpesh nuk thuhet: vetëdeklarimi me kohë kushton shumë më pak se një gjetje në kontroll. Sipas nenit 110 të Ligjit 08/L-257, kur tatimpaguesi vetëdeklaron para se të njoftohet për kontroll, gjobat bien në 25%; pas njoftimit por para fillimit të kontrollit, në 50%. Si mekanizëm i ndarë, pagesa e njëhershme e tatimit dhe e interesit e ul gjobën në 30%. Prandaj hapi i parë pas marrjes së një dosjeje të parregullt është vlerësimi se çfarë duhet vetëdeklaruar dhe sa shpejt.

Rregullimi i periudhave të kaluara është punë njëherëshe dhe nuk hyn në tarifën mujore; e vlerësojmë veçmas dhe jua themi para se ta nisim, kurrë pasi ta kemi bërë — sa kushton kjo për biznesin tuaj dhe nga cilët faktorë varet tarifa, e kemi shpjeguar hapur te faqja si e llogaritim çmimin. Nëse ju pret edhe një kontroll i ATK-së, përgatitja praktike është te udhëzuesi për kontrollin tatimor.

Sektorët ku kemi përvojë

Përvoja në sektor kursen kohë e gabime. Punojmë rregullisht me ndërtimtari, ku situacionet, kontratat afatgjata dhe nënkontraktorët kërkojnë trajtim të kujdesshëm të të hyrave; me tregti dhe import-eksport, ku dokumentacioni doganor, stoqet dhe kostoja e mallit të shitur janë boshti i llogarisë; me OJQ dhe projekte donatorësh, ku raportimi për donatorin ecën paralel me atë tatimor; me shërbime dhe HoReCa; me kultivim fidanësh dhe pemëtari; dhe me gurëthyes.

Për kë është ky shërbim

Biznese individuale, SH.P.K., OJQ dhe kompani të mesme, të sapohapura ose me vite veprimtari. Nëse sapo po e hapni biznesin, shikoni edhe këshillat biznesore; nëse ju duhet vetëm planifikimi tatimor, kemi këshilla tatimore. Kur biznesit i lind detyrimi për rishikim ose auditim të pasqyrave financiare, e mbulojmë edhe atë — me ekipe të ndara, siç e kërkon pavarësia.